Mark 14
Diu babadidi Yesu kana pota a yesi
(Metiu 26:1-5; Luk 22:1-2; Diyoni 11:45-53)
1Laḡani labu muliḡa kaka vawaitauli bi buledi tabatabana mote muu'a vaitena soina sa voiyena. Pilisi edi babada bi waiḡake tauwailovelovena kandavonemo eta a tavutavu te bainewa maso Yesu a pani bi ai peki. 2Tedi a giuna gado, “Mote soimo tama voiye male lava taka ḡasiḡasidi.”Waivini gauba panepanena Yesu dabanemo i ḡini
(Metiu 26:6-13; Diyoni 12:1-8)
3Betenimo Saemon sida kapa vaivaina ena vanuwemo Yesu i miya i kanikani bi waivini gauba panepanena dubina i vai tavaite. Kamaina bi dubi gadona i kula koto bi Yesu dabanemo i ḡini. Niga gaubina ba ḡawaḡawa isana Nad masinemo a voiye bi maiina i didiga gulata. 4Lava ḡesaudi ḡome a miyamiyana a medi bi taudiḡa ai giugiuna gado, “Bai aubaina gauba panepanena i wai yakali? ▼ 5Mba maso ai kunekunee bi maso mane didiga otina a vai te maso lava wainuwatoitoidi a vitedi.” Bi tedi waivini a giuvitavitale.6Bi Yesu i giuwedina gado, “Ko kita kamaḡe! Bai aubaina ko kaka nuwalaḡalaḡa? Tana kauwa visuvisuna tagu aubaigu i voiye. 7Temi lava wai nuwatoitoidi laḡan wapawapa vaitedi ko miyamiya, bamoda sagudi ko ḡoyena ba walilaḡanimo ko sagudi bi tagu mote temi vaitemi tama miya nonoḡa. 8Tana i sibe te bai ya voivoiye. Gauba panepanena tubuḡigumo i ḡinina, ba i ka nonoḡina muliḡa laudobo aubaina. 9Yea giugiu kauwemi, dobu matabunemo lava giu visuvisuna sa lauguguyaena ba niga waivinina bai i voivoiyena sa noḡoti bi sa giuwata.”
Diudas i wai anina te Yesu ya kaisoluḡe
(Metiu 26:17-25; Luk 22:7-14, 21-23; Diyoni 13:21-30)
10Diudas Iskaliot, tauwaikaiwatana 12 nopodimo i nawa pilisi edi babada lisidimo bi i giuwedi te bainewa Yesu sa pani. 11Tedi bai i giugiuwedina, a vaiye bi ai nuwavisu gulata. Kamaina bi a sauge te mane sa vite. Ḡome Diudas gavogavo i tavutavu te maso nimedimo i sako.Vawaitauli soina a kani
12Bi buledi mote muu'a vaitena laḡanina i tava, ḡome lava sipu natunatudi lauewalidi a vunudi, bi a lausewasewaedi vawaitauli soinemo. Ena tauwaikaiwatana ai talayena gado, “Bamo ḡome kuna ḡoyeḡoyena vawaitauli kanina ka voiye?”13Kamaina bi Yesu tauwaikaiwatana labu i giu wai lovelovedi bi i giu kamaḡedi: “Ko nawa Yelusalemmo ko tava, bi oloto ko kita gauba dubina ya avaavalina ko kaiwata. 14Bi bamo vanuwinemo ya valagetana, ba vanuwina taniwagina ko giuwena gado, ‘Tauwailovelove nigamai i giu: Bamo gabunemo tagu bi egu tauwaikaiwatana vaitedi, vawaitauli kanina ka kani?’ 15Bi ḡome vanuwina noponemo gabu dididiga kaka nonoḡina yai lovemi. Ḡome temi bai matabuna aubaida koka nonoḡi.”
16Kamaina bi tauwaikaiwatana a nawa, malagai dididiginemo a tava, bi bai matabuna Yesu bainewa i giugiuwena mai a banavi. Bi ḡome vawaitauli kanina a kanonoḡi.
17Aubigamo Yesu ena tawaikaiwatana vaitedi a tava. 18Laḡannemo a miya a kanikani, Yesu i giuna gado, “Yea giugiu kauwemi, ḡemota modomimo male ya kaisoluegu tana aiyai vaitena ka kanikanina.” b
19Tauwaikaiwatana nuwedi i gebo, bi ḡemoḡemotaḡa ai talayena gado, “Bada kwa giu, mote tagu, ee?”
20Yesu i giuwedina gado, “Temi 12 modomimo ḡemota, tana aiyai vaitegu ena buledi abomemo yai dakwana. 21Mai bena wala a kulikulina noponemo te Tana Taunana Natuna male ya peki; bi i gebo kauwa te oloto aiyai Tana Taunana Natuna ya kaikaisoluye! Avena te mba olotona mote maso i tubuḡa.”
22Ḡome a kanikani bi Yesu buledi puselina i vai, i laupali, i vilikivi, bi ena tauwaikaiwatana i vitedi. Bi i giuwedina gado, “Niga ko vai, tagu tubuḡigu.”
23Kota ledu i vai, tamana i wai ebone, bi tedi matabudi ledunemo a lautego. 24Yesu i giuwedina gado, “Niga ba tagu kwasinigu i nuwaḡini lava wapewapedi aubaidi, tagu kwasinigu Maimaituwa ena waianina ya voiye te ya ḡailisi.” 25Yea giugiu kauwemi, tagu male mote niga wainina yama tego munaḡe ee te Maimaituwa ena waibada laḡannemo kaka waen valivaliuna yea tego.”
26Kamaina bi a sale i kovi bi a nawa Olip oyanemo.
Yesu Pita ena valele i gei giuwe
(Metiu 26:31-35; Luk 22:31-34; Diyoni 13:36-38)
27Yesu tedi matabudi i giuwedina gado, “Temi matabumi male ko velau ko ḡosegu, mai bena kulikulina wadubonemo Maimaituwa niga mainana i giu:‘Tagu kaka tauwaiḡamoḡamo yai peki, bi sipu kaka sa dabalala.’” c
Taunana aubaina temi matabumi kaka ko velau ko nawa. 28Bi laḡannemo tagu yea kena moito, male yea dolidoli Galilimo.”
29Tana mai i giugiu, ba Pita ena giu i wai munena gado, “Egu lava ḡesaudi male sa velau sa nawa bi tagu ba mote yea ma gosem!” 30Yesu Pita i giuwena gado, “Yea giugiu kauwem te mateya dudubalemo, muliḡa ka malabu kamkam ya ḡaba, tam ma faiona kwa giu te mote ku sibegu.
31Pita kalinana bagibaginemo i giuna gado, “Tagu male mote mai yea ma giu. Avena te bainewa bi male vaitem ta peki. Tagu male mote yeama valeleem.” Bi ḡesaudi giuna ḡemotina a giuwe.
Yesu Getsemenimo i laupali
(Metiu 26:36-46; Luk 22:39-46)
32Tedi dobu isana Getsemenimo a tava, bi Yesu ena tauwaikaiwatana i giuwedi, “Niga ḡome ko miyamiya bi tagu ya nawa ya laupali.” 33Kaimaina bi tana Pita, Diyemesi bi Diyoni vaitedi a nawa. Bi tana yavi bi nuwaboya nopona i wai wanavu. 34Bi i giuwedina gado, “Nuwaboya nopogumo i didiga gulata, ḡotona te yai pekigu. Niga ḡome ko miya bi ma noḡotimi ko wai kita.”35Yesu ḡotona i taunawa, bi i nuwalikwa doḡamo i talaḡa, bi i laupali, bamoda ḡemoḡemotina, te niga wainuwatoina mote maso i vai. 36Kamaina bi i laupalina gado, “Tamagu, Tamagu! Bai matabuna tam lisimmo i tekateka. Niga wainuwatoina leduna lisigumo kwa kaikamaḡe. Bi geḡa te mote tagu egu ḡowana bi tam em ḡowana.”
37Yesu i tava munaḡa bi ena tauwaikaiwatana faiona i kitedi a kena kwavu. Kamaina bi tana Pita i giuwena gado, “Saimon, tam kwa kenakena ee? Maso ḡemoḡemotina kuna tauwai kita laḡan ḡaubona? ▼ 38Ko kita kauwa bi ko laupali te mote laulubumo koma kuluva. Aluimi ya ḡoyeḡoye bi tubuḡa i gwaḡa.”
39Kota i munaḡa i laupali, giuna ḡemotina i giugiuwe. 40I nato munaḡa i kitedi a kenakena, banina tedi mote ḡemoḡemotina te sai kita. Bi mote a sibe te bai maso sa giuwe.
41Bi ena tava waifaioninemo i giuwedina gado, “Temi yaḡolo ko waiyawasi? Kena avena, ko kita, laḡanina i tava, te Tana Taunana Natuna sa kaisoluḡe gebogebo lavedi nimedimo sa sako. 42Ko moito! Ta nawa, ko kita, oloto taukaisoluegu kaikana i tava!”
Yesu a pani
(Metiu 26:47-56; Luk 22:47-53; Diyoni 18:3-12)
43Yesu yaḡolo i giugiu bi Diudias taukaiwatana ḡemota 12 nopodimo i tava. Lava kumna edi madamada bi kepata a tanodi bi tana vaitena a tava. Pilisi edi babada, waiḡake tauwailovelovena bi Diu babadidi niga lavedi a giu kamaḡedi a tava. 44Diudas lava kumna i giuwainonodi te mataila yai lovedi, “Bamo taunana yai suluvena, ba taunana ko pani bi ko kita te mote ima naila ima nawa.”45Noi taunana a tavatava, te Diudas i nawa ota Yesu lisinemo, bi i giuna gado, “Tauwailovelove,” bi i wai suluve. 46Kamaina bi Yesu a pani bi a kuladidi. 47Bi ḡome diyanemo taumoito ḡemota ena kepata i wai guli, te pilisi saḡasaḡa guletina ena taunoya beyana i tadi kamaḡe. e 48Kamaina bi Yesu i giuwedina gado, “Temi kepata bi madamada vaitedi kona avala tava, te tagu ko paniguna mai bena tauwaibeyapota ee?
49Laḡan matabuna tagu Maimaituwa ena vanuwemo e wai lovelove, bi mote ko panigu. Kulikulina wadubonemo i giugiuwena niga taunana ya tubutubuḡa.” 50Kamaina bi ḡome ena tauwaikaiwatana a ḡose bi a velau a nawa. 51Oloto ewalina ḡemota Yesu i kaikaiwata bi ena kaleko potipotina i kotekotena bena maso a kaididi 52bi geḡa te ena galaḡa a soluḡiḡi kamaḡe bi tana kofakofana i velau i nawa.
Yesu Diu edi babada matedimo i etala
(Metiu 26:57-68; Luk 22:54-55, 63-71; Diyoni 18:13-14, 19-24)
53Kamaina bi Yesu ai dolinawe pilisi saḡasaḡa guletina ena vanuwemo, bi ḡome pilisi edi babada bi waiḡake tauwailovelovena Diu babadidi ḡesaudi a tava ai ḡemotidi. 54Pita Yesu mulinaḡa i vavawaiyava, tana didimanina i nawa pilisi saḡasaḡa guletina ena vanuwa mataetinemo. Tana ḡome etala gabuna taulabena vaitedi a miya kai diyanemo a malimalili. 55Pilipilisi edi babada bi bolu babadidi ḡesaudi tedi Yesu ena gebo a tavutavuḡe te maso ai peki, bi mote aiyai lisinemo giukauwa a vai. 56Lava wapewapedi a tava wai wavu a giuwedi, bi edi giu tabudi bi tabudi.57Lava ḡesaudi a moito wai wavu kaikaiyovudi lisinemo a giuna gado, 58“Tama ke vaiye i giuna gado, ‘tagu kaka Maimaituwa ena vanuwa lava a kelikelina, ya kagebogebo bi laḡan faiona nopodimo ḡesau ya keli, mote lava nimedimo voivoiyena.’” f 59Bi yaḡolo te edi giu tabudi bi tabudi.
60Kamaina bi pilisi saḡasaḡa guletina i miya moito i nato bi Yesu i wai talaye, “Bai kwa giuwe ee ḡeḡa? Niga lavedi sa wai wavum.”
61Bi tana i miya moimoisili, mote bai i giuwe. Bi kota pilisi saḡasaḡa guletina i waitala munaḡe bi i giuna gado, “Tam taunana Vinevinena, Maimaituwa ta kaka saḡesaḡena natuna, ee?
62Bi Yesu i giu, “Tagu taunana Vinevinena, Tana Taunana Natuna kaka ko kita tamana ḡaiḡailisina kataiyanemo ya miyamiya, bi galewemo ma giyouna ya yovo.” g
63Ḡome pilisi saḡasaḡa guletina ena gala i kula lisi bi i giuna gado, “Tama niganana mote giu ḡesaudi vaiyedi kama ḡoyeḡoye.” 64Bainewa ko noḡonoḡoti, kaikana beyademo te vaiye te i wai diboḡi te Maimaituwa i sako yovoḡe. ▼ , i
Tedi matabudi a binauna gado, “Tana i wai diboḡa, kamaina te ya peki.”
65Bi lava ḡesaudi Yesu a gelolo, matana a suma, a kwapu bi a giu, “Tena ku giu, aiyai i kwapum?” Kamaina bi ganakuku tauyavena Yesu a kaididi bi a lau nevanevakau.
Pita Yesu i valeleye
(Metiu 26:69-75; Luk 22:56-62; Diyoni 18:15-18, 25-27)
66Pita yaḡolo pilisi saḡasaḡa guletina ena vanuwa mataetinemo bi pilisi ena taunoya waivinina ḡemota i tava. 67Ḡome Pita i kita i malimalili bi i kita didi bi i giuwena gado, “Tam taunana Nasalet Yesuna vaitena kona nawanawa ḡemota.”68Bi geḡa te tana i valele bi i giuna gado, “Tagu mote e sibe, bai kwa giugiuwe.” Kamaina bi Pita i miya moito bi ganakuku mataetina yawaninaḡa i nawa. Kamaina bi kamkam i ḡaba. ▼
69Ḡome taunoya waivinina Pita i kita bi giuna ḡemotina diyanemo taumoitoi i giuwedina gado, “Niga taunana edi tau ḡemota.” 70Bi Pita kota i valele munaḡa. Kamaina bi a taumiya mala ḡaubona bi diyanemo taumoito Pita a giu munaḡena gado, “Mote kuma valele, kamaina te tam taunana Galili lavam.”
71Bi Pita Maimaituwa isanemo i waisaḡinana gado, “Kagusai Tamagu, yea giugiu kauwemi te tagu lavana ko giugiuwena mote yea sibe.”
72Noi taunana te kamkam ḡaba i wai labu, mulinemo Pita Yesu ena giu i noḡoti: “Muliḡa kaka kamkam ma labu ya ḡabana, tam kaka ma faiona kwa valeleyegu.” Kamaina bi Pita i laudulu bi i ḡaba te i ḡaba gulata.
Copyright information for
KQF